Հայերը նախընտրում են կանեփից պատրաստված հաճույքը

Հանրապետության նարկոլոգիական կենտրոնի տնօրեն Պետրոս Սեմերջյանն այսօրվա ասուլիսում խոսելով թմրանյութերի մասին, նշեց, որ հայերը հաճույք ստանալու միջոցներից հիմնականում նախընտրում են կանեփից պատրաստածները:

Իսկ բացի դրանից օգտվում են նաև ափիոնի տեսակներից:

Մասնագետի հավաստմամբ, ոչ միայն Հայաստանում, այլ ամբողջ աշխարհում ամենատարածված թմրամիջոցները կանեփից պատրաստվածներն են:

Թմրանյութերի օգտագործման ռեյտինգային առումով, աշխարհում երկրորդ տեղում ամֆետամիններն են, որոնք, պրակտիկորեն, Հայաստանում չեն օգտագործվում, երրորդ տեղում կոկայինն է, որը նույնպես մեր հանրապետությունում չկա, իսկ չորրորդ տեղում ափիոնատիպ թմրանյութերն են, մասնավորապես, հերոինը, ինչն օգտագործվում է նաև մեզ մոտ:

Թմրանյութերի ազդեցությամբ տառապող մարդու բուժումը, մասնագետի հավաստմամբ, նախատեսում է կախյալության վերացումն ու առողջության վերականգնումը: Այսօրվա բժշկական հնարավորությունների պայմաններում դա լիովին իրականացվում է, մարդը դուրս է գալիս դիսպանսերից լիովին առողջ: Թմրամոլների մոտ սոմատիկ հիվանդություններն ավելի սուր են արտահայտվում, քանի որ նրանց օրգանիզմը թույլ է լինում ու չի կարողանում դիմակայել, պայքարել հիվանդությունների դեմ: Թմրամոլության հետ կապված մեծ վտանգներ կան՝ երկու հիվանդությունների զարգացման համար. ՄԻԱՎ վարակի և Հեպատիտ C-ի: Հայաստանում ՄԻԱՎ վարակով հիվանդների 50%-ը վարակվել են ներերակային թմրամիջոցներ օգտագործելով, իսկ թմրամոլների մոտ 80%-ն ունեն Հեպատիտ C:

Վերջում, մասնագետը խոսելով թունամոլության մասին նշեց, որ հանրապետությունում այն տարածված է հիմնականում, երեխաների մոտ, հատկապես՝ մանկատներում։ Ի դեպ, դեռևս 15-րդ դարում հայ բժիշկներն իրենց հետազոտությունների ժամանակ անդրադարձել են թմրակախվածության խնդրին և նույնիսկ ներկայացրել են բուժման մի քանի մեթոդներ:

Հարցեր, պատասխաններ, մեկնաբանություններ